Дар хобгоҳи Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд бахшида Рӯзи умумиҷаҳонии саломатӣ бо иштироки Назокат Иброҳимова, мудири шуъбаи иттилоотии Маркази ташаккули тарзи ҳаёти солими вилояти Суғд, Гулчеҳра Бобоҷонова, директори Маркази тарзи ҳаёти солими шаҳри Хуҷанд, Насимҷон Абдуғаниев, духтур-кардиологи Маркази саломатии №6 шаҳри Хуҷанд, Муяссар Қаюмова, директори Маркази репродуктивии Маркази саломатии №6 шаҳри Хуҷанд, Мавҷуда Машокирова, директори Маркази вилоятии кори ҳамширагони тиб, Мамлакат Баҳодурова, ҳамшираи оилавии минтақавӣ, ва Мутриба Дадобоева ҳамшираи тиббии донишкада бо донишҷӯёни дар хобгоҳ истиқоматкунанда мулоқот доир гардид.

Мулоқотро мудири шуъбаи тарбия ва кор бо ҷавонони донишкада Муҳаррам Темурова ифтитоҳ намуда, меҳмононро муаррифӣ ва ҳадафи мулоқотро шарҳ дод. Таъкид шуд, ки саломатӣ — солимии табиӣ, маънавӣ ва иҷтимоии инсон мебошад. Саломатӣ ба инсон имконият медиҳад, ки муддати дароз ва фаъолона дар шароитҳои гуногунӣ муҳит кор ва фаъолият намуда, ба шароитҳои номусоиди он тоб оварда муқовимат кунад то ин, ки суботкории хешро нигоҳ дорад. Дараҷаи саломатиро фаъолияти эътимодноки силсилаҳои алоҳида, алоқа бо муҳити атроф, қобилияти корӣ, имконияти васеи мутобиқшавӣ, захираҳои ҷавоб доданро ба таъсиротҳои гуногун муайян мекунад. Ҳангоми аз ҳадд берун амал кардани қувваҳои муҳовизаткунанда ва нигоҳдоранда ҳолате ба вуқуъ мепайвандад, ки онро ҳолати муқобили беморӣ меноманд, ки вай боиси инкишофи беморӣ мегардад.

Назокат Иброҳимова, мудири шуъбаи иттилоотии Маркази ташаккули тарзи ҳаёти солими вилояти Суғд дар баромади худ иброз дошт, ки аз соли 1950 инҷониб дар саросари ҷаҳон 7 апрел Рӯзи умумиҷаҳонии саломатӣ дониста мешавад. Ҳамасола бахшида ба ин рӯз дар аксар давлатҳои ҷаҳон таҳти шиорҳои гуногун ҳамоиш ва чорабиниҳои гуногуни тиббӣ доир мегарданд. Президенти Ҷумҳурии Тоҷикистон муҳтарам Эмомалӣ Раҳмон пайваста иброз медоранд, ки «Солимии ҷомеа боигарии давлат аст».

Мавсуф қайд намуд, ки олимони физиолог ва духтурон таъкид мекунанд, ки инсон метавонад шуруъ аз лаҳзаҳои нахустини таваллуд 100 сол бе беморӣ зиндагӣ намояд. Ба шарте, ки агар инсон аз давраи ба дунё омаданаш тарзи ҳаёти солимро интихоб намояд. Тарзи нодурусти зиндагӣ ва камҳаракатӣ дар аксар давлатҳои ҷаҳон сабаби зиёд шудани ҳолатҳои гирифторӣ ба бемориҳои дилу рагҳои хунгарди инсонҳо гардидааст, ки мутаассифона, Тоҷикистон низ аз ин ҳисоб истисно нест. Яъне барои саломат умр ба сар бурдан аввал бо варзиш машғул шудан, пас аз он ғизои хуб хӯрдан ва баъдан хоби бофароғат рафтан зарур аст. Шоҳсутуни асосии саломатӣ ин се чиз аст, ки илми муосир низ онро эътироф кардааст.

Насимҷон Абдуғаниев, духтур-кардиологи Маркази саломатии №6 шаҳри Хуҷанд дар баромади худ иброз дошт, ки инсон бояд дар як сол як маротиба аз муоинаи тиббӣ гузарад. Зеро ҳама узвҳо ва система бо якдигар мутобиқ карда шудаанд. Агар як узв фаъолияти худро аз даст диҳад ё ягон ориза пайдо намояд, ин ба дигар узвҳои инсон бе таъсир намемонад. Инчунин организм ба истироҳати мунтазам ниёз дорад ва беморӣ метавонад боиси хастагии шадид, руҳафтодагӣ ва бад шудани шакл дар узви инсон гардад.

Мавҷуда Машокирова, директори Маркази вилоятии кори ҳамширагони тиб нисбати гигиенаи шахсӣ сухан намуда, чунин илова намуд, ки обутоб додани бадан дар пешгирии бемориҳо нақши муҳим мебозад. Сайругашт дар ҳавои тоза, хоби бароҳат, пӯшидани либосҳои мавсимӣ, ҳаёти солим, машғул шудан ба варзиш ва истироҳати бомеъёр эҳтимоли гирифторӣ ба бемориҳоро кам менамоянд.

Мулоқот бо саволу ҷавоб ҳусни анҷом пазируфт.

Шуъбаи иттилоот ва кор бо ВАО